Kurdish Library

Om Kurdiska Biblioteket i press

Azadiya Welat
Hejmar 200, 1999

Ferhenga Tirkî–Kurdî ya nû derket

Soreş Reşî

Ferhenga Tirkî–Kurdî ya ku ji aliyê Mehmet Tanrıkulu ve hatibû amadekirin, bi piştgiriya "Pirtûkxaneya Kurdî ya li Stockholmê" û ya Swêdê bi navê "Podiom" bi teknîka nû (dijîtal) çap bû. Ji bo nasandina ferhengê, roja 21'ê sermawezê li Pirtûkxana Kurdî ya li Stockholmê civînek pêk hat. 40–50 kes beşdarî civîna nasandinê bûn û dîtinên xwe yên li ser ferhengê anîn zimên.

Ferhenga 525 rûpelî ji 23 hezar peyvan pêk tê û ev ferheng bi pergala dijîtalê hatiye amedekirin. Li gorî agahiyan keda 20 salan di ferhengê de heye. Bi riya întermetê her kes dikare jê sûdê wergire.

Ferhenga Tirkî–Kurdî ku bi piştgiriya Podium û Pirtûkxaneya Kurdî, hate çapkirin, di nav nivîskar û medyaya Swêdê de jî deng veda. Rojnameya rojane ya bi navê "Svenska Dagbadet" ku li Swêdê tê weşandin, roja 16'ê sermawezê, li ser ferheng û qedexeya li ser zimanê kurdî, nivîseke bi sernavê: "Ji bo diyalogê di navbera tirk û kurdan de alîkariyeke din" bi berfirehî cih girt.

Di belavoka weşanxaneyê de rojnamegerê bi nav û deng Arne Ruth, wiha dibêje: "Mafê zimanê dayikê ji mafên mirovatî yên bingehîn e. Qutkirina ji zimanê zikmakî, tê wateya qutkirina ji nasnav, çand û dîroka mirov."

Nivîskar û berpirsiyarê weşanxaneya Podium, Peter Curman jî wiha gotiye: "Her kes bi mafê xwe yê ziman û çandî heye. Gelê kurd di welatê xwe de, ji mafê xwe yê nasnavê qut bûyê. Mimkûn e ku ev ferheng bibe sedama diyaloga di navbera kurd û tirkan de."

Di civîna roja 21'ê sermawezê de ku li Pirtûkxaneya Kurdî pêk hat, gelek nivîskar, rewşenbîr, xwediyên çapxaneyan û nivîskar Mehmet Tanrıkulu beşdar bû. Xwediyê pirtûkxaneyê Nedim Dağdeviren bo beşdariya mêvanan dilxweşiya xwe anî zimên û mafê axaftinê da Mehmet Tanrıkulu. Tanrıkulu axaftineke kurt kir û got, ew dixwaze bêhtir li beşdaran guhdarî bike. Gelek kesan mafê axaftinê stand û bi piranî rexneyên xwe anîn zimên.

Nivîskar–helbestvan Mehmet Tanrıkulu di sala 1952'an de li Farqînê hatiye dinê. Wî, lîse û înstîtuya perwerdehiyê li Amedê kuta kir. Ji sala 1986'an şûn ve derkete derveyî welêt û li Germanistanê dijî. Wî di kovara Tîrêj de edîtorî kiriye û di sala 1995'an da li Swêdê pirtûkeke helbestan a bi navê "Destê min li destê te digere!" çap kiriye.

Ji bo kesên ku bixwazin lê binêrin, navnîşana ferhengê ya înternetê ev e: www.podium.nu

© Şoreş Reşî och Azadiya Welat

31-08-2001